பண்பாட்டைச் சீரழிக்குமா பிக்பாஸ்? - சோழ. நாகராஜன்

அண்மைக் காலத்தில் தமிழகத்தில் `பிக்பாஸ் போல இத்தனை பரபரப்பை உண்டாக்கின வேறொரு தொலைக்காட்சி நிகழ்ச்சியைச் சொல்லமுடியாது. விஜய் தொலைக்காட்சியில் கடந்த 30 நாட்களுக்கும் மேலாக ஓடிக் கொண்டிருக்கிறது கமல்ஹாசன் நெறியாளராகப் பங்கேற்கும் இந்த பிக்பாஸ். தமிழில் புதிய புதிய நிகழ்ச்சிகளை உருவாக்கும் விஜய் தொலைக்காட்சி பிக்பாஸ் என்ற முற்றிலும் புதிய வடிவிலான நிகழ்ச்சியை நடத்தப்போகிறது என்ற பேச்சு அடிபட்டபோதே அது தொடர்பான எதிர்பார்ப்புகளும் உருவாகத் தொடங்கிவிட்டன. கமல்தான் இதனை நடத்தப்போகிறார் என்ற செய்தி பலரையும் பரபரக்கவைத்தது.

இதில் பங்கேற்ற உறுப்பினர்கள் மொத்தம் 15 பேர். அவர்கள் ஒரே வீட்டில் நூறு நாட்களுக்குத் தங்கவேண்டும் என்பது நிபந்தனை. அங்கே தங்குபவர்கள் வெளித்தொடர்பு எதையும் பெற முடியாது. அலைபேசி, தொலைக்காட்சி, செய்தித்தாள் எதுவும் கிடையாது, படிக்கப் புத்தகங்களோ; எழுத நோட்டோ - பேனாவோ எதுவும் கிடையாது. உள்ளே இருக்கும் நாளெல்லாம் அவர்கள் தங்கள் உணவைத் தாங்களே தயார் செய்துகொள்ள வேண்டும். கழிவறைகளைத் தாங்களே சுத்தம் செய்துகொள்ள வேண்டும், தங்களுக்குத் தேவையானவற்றை குழுக்களாகப் பிரிந்து நிறைவு செய்துகொள்ள வேண்டும். அப்புறம் தினமும் ஏதாவது போட்டி, விளையாட்டு, நடனம், நடிப்பு என்று போய்க்கொண்டேயிருக்கும். நூறு நாட்களை ஓட்டவேண்டாமா? இதில் பங்கேற்பாளர்களுக்கு மட்டுமல்லாமல் தொலைக் காட்சியில் நிகழ்ச்சியைப் பார்க்கிறவர்களுக்கும் கடமைகள் உண்டு. ஒவ்வொரு வாரமும் நிகழ்ச்சிப் பங்கேற்பாளர்கள் ரகசிய அறைக்குச் சென்று தாங்கள் யாரை இந்தப் போட்டியிலிருந்து வெளியேற்ற விரும்புகிறோம் என்று தங்கள் அனுபவத்திலிருந்து ஒவ்வொருவரும் சொல்லவேண்டும். அதிகம் பேர் பரிந்துரைத்த மூன்று நபர்களில் ஒருவரை நேயர்கள் வாக்களித்து வீட்டுக்கு அனுப்புவார்கள். இப்படி பல விதங்களிலும் உள்ளேயிருப்பவர்களுக்கும் வெளியே பார்த்துக்கொண்டிருப்பவர்களுக்கும் அலுப்புத் தட்டாமல் நிகழ்ச்சியைக் கொண்டுபோக மண்டையைக் குடைந்து, யோசித்து யோசித்து வடிவமைக்கப்பட்டிருக்கிறது இந்த பிக்பாஸ்.

பங்கேற்பாளர்கள் 15 பேர்களில் பெரும்பாலோர் சினிமாத்துறையைச் சேர்ந்தவர்கள். வேறு துறைகள் சார்ந்தோர் சிலரும் உண்டு. நடிகர்கள் வையாபுரி, கஞ்சா கருப்பு, கணேஷ் வெங்கட்ராம், பரணி, ஸ்ரீ, விளம்பர மாடல் ஆரவ், இயக்குநர் பி. வாசுவின் மகன் சக்தி, கவிஞர் சிநேகன், நடிகைகள் நமீதா, ஓவியா, ஆர்த்தி கணேஷ், அனுயா, நடன இயக்குநர் காயத்ரி ரகுராமன், மிஸ் இந்தியா அழகிப் போட்டியில் பங்கேற்ற ராய்சா வில்சன், மெரினாவில் நடந்த ஜல்லிக்கட்டுக்கு ஆதரவான போராட்டத்தில் கலந்துகொண்டு பலரின் கவனத்தை ஈர்த்த ஜூலியானா ஆகியோர்தான் பங்கேற்பாளர்கள். ஆர்ப்பாட்டமான விளம்பரங்கள், துவக்க விழா என்று துவக்கத்திலேயே பார்வையாளர்களது எதிர்பார்ப்பைக் கிளறிவிட்டிருந்தது இந்த பிக்பாஸ்.

பிக்பாஸ் தொடங்கிய சில நாட்களிலேயே கமல்ஹாசன் தமிழக\ அரசின் மீது ஊழல் குற்றச்சாட்டைக் கடுமையாக முன்வைத்து ட்விட்டரில் எழுதியதால் ஒரு பக்கம் ஆளும் கட்சித் தரப்பிலிருந்தும், மத்தியில் ஆளும் பாஜகவின் தமிழகத் தலைவர்களிடமிருந்தும் பெரும் எதிர்ப்பை எதிர் கொண்டார். ஆனால், அந்த எதிர்ப்பிற்கு அஞ்சிடாமல் பதிலுக்கு பதில் கொடுத்துக்கொண்டுமிருந்தார். இதன் காரணமாகவும் தொலைக்காட்சி நேயர்களின் முதல் விருப்பமாக பிக்பாஸ் ஆகிப்போனது.

முதல் வார இறுதிநாளான சனிக்கிழமையன்று கமல் மீண்டும் பார்வையாளர்கள் முன்னிலையில் தோன்றினார். பங்கேற்பாளர்களின் நடவடிக்கைகள், பேச்சுக்கள், அவர்களுக்குள் உண்டான முரண்கள், அதனையொட்டி எழுந்த வசைச் சொற்கள் என்று எல்லாம் அலசப்பட்டன. இதேபோல ஞாயிறு அன்று கமல் தோன்றும் நிகழ்வு. மற்ற நாட்களில் அந்த அடைக்கப்பட்ட வீட்டினுள் இருக்கும் பங்கேற்பாளர்களின் சண்டைகள், பரிவுகள், குழு மனப்பான்மையோடு அவர்கள் பேசும் புறணி என்பதையெல்லாம்விட ஒவ்வொரு வாரமும் சனி, ஞாயிறு ஆகிய கிழமைகளில் கமல் தோன்றுகிற நிகழ்வு சற்றே சுவாரஸ்யம் நிறைந்ததாய் உருப்பெற்றது ஒரு கட்டத்தில். கமலின் பங்கேற்பு நிகழ்ச்சிக்கு மெருகேற்றுவது காரணமாக மற்ற நாட்களில் பிக்பாஸ் பார்க்காத, பார்க்க இயலாதவர்கள்கூட சனி, ஞாயிறுகளின் பார்வையாளர்கள்ஆனார்கள்.

ஒருபுறம் மக்களின் பெரும் வரவேற்பைப் பெற்ற வெற்றிகரமான நிகழ்ச்சியாக பிக்பாஸ் கருதப்பட்டாலும் இதற்கு சமூக வலைத்தளங்களிலும், பொதுவெளிகளிலும் கடுமையான எதிர்ப்புகளும் கிளம்பியதைக் காண முடிந்தது. ஒரே இடத்தில் எந்தவிதமான சம்பந்தமும் இல்லாத ஆண்களையும், பெண்களையும் நூறு நாட்களுக்கு அடைத்துவைப்பதா? நமது\ கலாச்சாரம் என்னாவது? பண்பாட்டுச் சீரழிவில்லையா இது என்றெல்லாம் கலாச்சாரக் காவலர்களும், மதவாத அமைப்புகளைச் சேர்ந்தோரும் குரலெழுப்பத் தொடங்கினார்கள். கமல்ஹாசனைக் கைது செய்யவேண்டும் என்றுகூட அறிக்கை விட்டனர். அதற்குத் தோதாக மேட்டிமையோடு சாதாரண மக்களை இழிவுபடுத்தும் விதமான உரையாடல் நிகழ்ந்தபோது முற்போக்காளர்களின் எதிர்ப்பும் சேர்ந்துகொண்டது. அதனைக் கமல் கண்டிக்கத் தவறிவிட்டார் என்றும், அவரது பதில் மழுப்பலானது என்றும் விமரிசனங்கள் வந்தன.

ஆனாலும் வேறு எந்த நிகழ்ச்சிக்கும் இதுவரையில் தராத மகத்தான ஆதரவை தமிழ் மக்கள் இந்நிகழ்ச்சிக்கு அளித்து வருகின்றனர். 4 கோடிப் பேர் இதனை தினமும் பார்ப்பதாக ஒரு புள்ளி விபரம் சொல்கிறது. இதன் வெற்றிக்கு முதற்காரணமாக நடிகர் கமல்ஹாசனைத்தான் சொல்ல வேண்டும். அவரது பக்குவமான அணுகுமுறை நிகழ்ச்சிக்கு மாபெரும் பலம். தனது விரிந்த சமூக சிந்தனையை, பட்டறிவை அவர் மிக நேர்த்தியாக வெளிப்படுத்தும் விதம் காண்போரைக் கட்டிப்போடுகிறதென்றால் அது மிகையல்ல. தங்களது தவறான பேச்சுக்களால், நடத்தைகளால் வெளியேறும் நபர்களை அவர் ஆற்றுப்படுத்தி அனுப்பும் விதம் அபாரமானது. வெளியேறுகிறவர்களிடமிருந்து படிப்பினைகளைப் பெறும் உள்ளிருப்போர் தங்களது தவறுகளைக் களைந்து கொண்டு பண்பட்டுவருவதையும் பார்க்கமுடிகிறது.

நூறு நாட்கள் என்ற சவாலில் இதுவரையில் மூன்றில் ஒரு பங்குதான் நிறைவடைந்திருக்கிறது. இன்னமும் நாட்கள் பல மிச்சமிருக்கின்றன. தொலைக்காட்சிகள் வணிக நோக்கத்தோடுதான் செயல்பட முடியும் என்பதை எவரும் மறுப்பதற்கில்லை. அந்த வணிகத்தினூடாக நமக்கும் சமூகத்துக்கும் ஏதாவது பலன் உண்டா என உற்றுநோக்க எவருக்கும் உரிமையுண்டு.

ஆனால், பெண்களைக் கட்டிப்போட்டுவைக்கும் மெகா  தொடர்களுக்கு மத்தியில், பில்லி சூனியம், பேய், பிசாசு என்று சமூகத்தை அச்சத்தில் கிட்த்தும் நிகழ்ச்சிகளுக்கு ஊடாக, பக்தி வியாபாரம், பலவிதமான சாமியார்களின் உபதேசப் படையெடுப்புகளுக்கு இடையில் தமிழில் இந்த பிக்பாஸ் ஒரு புதிய முயற்சியாக இருக்கிறது. நிகழ்ச்சியை முழுவதுமாகப் பார்த்துவிட்டுத்தான் ஒரு முடிவுக்குப் நாம் போகமுடியும். டச்சு மொழியில் பிக்பிரதர் (2006) என்று தொடங்கிய நிகழ்ச்சி, பிக்பாஸ் என்று ஆங்கிலம், இந்தி, தெலுங்கு போன்ற மொழிகளில் வந்ததுதான் இந்த பிக்பாஸ். மற்ற மொழிகளில் வந்த நிகழ்ச்சிகள் பற்றி நாம் அறியோம். ஆனால் தமிழில் முழுக்க முழுக்க சினிமா உள்ளிட்ட கலைத்துறையினருடம் ஒரு ஜல்லிக் கட்டுப் போராளியைச் சேர்த்துக்கொண்டதுபோல, ஒரு விவசாயப் போராளியை, கல்வியாளர் ஒருவரை, மாணவர்களின் பிரதிநிதியை, ஒரு நல்ல அரசியல்வாதியை என்று இந்தப் பங்கேற்போர் கலவையை சற்றே மாற்றி யோசித்திருந்தால் இந்த நிகழ்ச்சி அறிவார்ந்த தளத்தில் வேறு சில சிந்தனைகளைப் பார்வையாளரிடத்தில் விதைத்திருக்கும். தற்போதைய நிகழ்ச்சியில் அந்த வீட்டில் தங்கியிருப்பவர்களிடம் சிறிது கூட சமூக அக்கறை வெளிப்படவேயில்லை என்பது வருத்தத்திற்குரியது. இருப்பினும் நாம் கேட்க விரும்புவது கமல் கேட்டதுபோல, இந்த ஒரு நிகழ்ச்சியால் சீரழிந்துவிடும் என்றால் அத்தனை பலவீனமானதா நமது பண்பாடு? தொடர்ந்து கவனிப்போம். நூறு நாட்களை நிறைவு செய்தபின் ஒரு முழு விமரிசனத்தை முன்வைப்போம். வெறும் வணிகத்தை மட்டும் இனி எவரும் முன்வைக்க முடியாது. அப்படி மட்டும்தானா முடியப்போகிறார் இந்த பிக்பாஸ்? பொறுத்திருந்துதான் பார்ப்போமே!

(cholanagarajan@gmail.com , 98425 93924)

                                     

இதர

வாட்ஸ் அப் விருந்து

இம்மாத பாராட்டு

அஞ்சலி

எதிர்வினை

ராஜகுரு பதில்கள்

ஓவியம் உங்கள் விரலசைவில் - தேவா

புல்லாங்குழல் கொடுத்த {மூங்}கிலிகளே! - டாக்டர் ஜி.ராமானுஜம்.

தீவிரவாதிகளில் பலரகம் உண்டு. சிலர் வெடிகுண்டு வைப்பார்கள். சிலர் தாமே மனித வெடிகுண்டாக மாறுவார்கள். இன்னும் சிலர் கவிதை எழுதுவார்கள். சில தீவிரத் தீவிரவாதிகள் அக்கவிதைகளைப் பிரசுரிப்பதும் உண்டு. என்போன்ற சில தீவிரவாதிகள் இசைக்கருவிகள் கற்றுக் கொள்ள முடிவெடுப்பார்கள்.

நான் புல்லாங்குழல் கற்றுக் கொண்டதற்கு முக்கியக் காரணம் எதிர்காலத்தில் மனைவியாக வரப்போகிறவளைத் துன்புறுத்த வேண்டும் என்பதற்காக அல்ல. அது பின்னாளில் நடந்த ஒரு பின்விளைவு. அது போன்றே குழலினிது யாழினிது என்ற குறளால் குழலோசையின் இனிமையால் கவரப்பட்டும் அல்ல. இசைக்கருவி ஏதாவது கற்க வேண்டும் என்ற ஆசை இருந்தது. திரு.சுந்தரம் என்பவரிடம் அடிப்படைகளைக் கற்கச் சென்றபோது கீபோர்டு அல்லது வயலின் கற்க வேண்டுமென்றால் அவற்றைக் கட்டாயம் வாங்க வேண்டும் என்று தெரிய வந்தது. அப்போது கீபோர்டு ஐயாயிரம் ரூபாய், வயலின் ஆயிரம் ரூபாய். அன்று ஜி.எஸ்.டி. இல்லை. இருந்திருந்தல் என் போன்றோர் வாங்கும் இசைக் கருவிகளுக்கு `இம்சை வரி எனப் புதிதாக ஒரு வரியைச் சேர்த்திருப்பார்கள். எனக்குச் சைக்கிளில் காற்றடைப்பதே அதிகபட்ச பட்ஜெட் செலவாக இருந்த சமயம் அது. ஆகவே இருப்பதிலேயே சீப் எது எனக் கேட்டேன்.

புல்லாங்குழல் ஐம்பது ரூபாய்தான் எனத் தெரிய வந்தது. அதைவிடக் குறைந்த விலையில் என்ன இருக்கிறது என்று கேட்டேன். மௌத் ஆர்கன் உள்ளது அதில் ஏழு ஸ்வரங்களெல்லாம் வராது.. ஓரிரண்டு மனது வைத்தால் வரும். அதைவிட மலிவாக வேண்டுமென்றால் விசில்தான் உள்ளது.. அதில் ஒரே ஒரு ஸ்வரம்தான் வரும். கல்யாணி, காம்போதி என்றெல்லாம் வாசிக்க முடியாது. வேண்டுமானால் ரிவர்ஸில் வரும் வாகனங்கள் சுவரில் முட்டாமல் இருக்க ஒரு எச்சரிக்கைக்\ கருவியாகப் பயன்படுத்தலாம் எனப் பதில் வந்தது. ஆகவே ஒரு சுபயோக சுபதினத்தில் புல்லாங்குழல் கற்பது என முடிவு செய்தேன்.

பிறகுதான் பெரும் பிரச்சினைகள். மற்ற இசைக்கருவிகளில் எளிதில் இசை ஸ்வரங்கள் வரும். கீ போர்டு மேல் ஒரு பெருச்சாளி குதித்தாலும் ஸா பா ஸா எனச் சத்தம் வரும். ஆனால் புல்லாங்குழலில் பிரம்மப் பிரயத்தனம் செய்தாலும் தேவர்மகனில் ரேவதி சொல்வதுபோல் வெறும் காற்றுதான் வரும். கூடவே நமது எச்சிலும் கலந்து வரும். அதிலும் சிலர் வந்து வீட்டில் எல்லாம் புல்லாங்குழல் ஊதக்கூடாது. வீட்டுக்கு ஆகாது என்றார்கள், இதற்காகச் சுடுகாட்டுக்குப் போய் வாசிக்கும் தைரியம் எனக்கு இல்லாததால் வீட்டிலேயே தொடர்ந்தேன். சதிலீலாவதி திரைப்படத்தில் சொக்கலிங்க பாகவதரிடம் `பொடி போடாதீங்க கான்ஸர் வரும் என்று சொல்வார்கள். அதற்கு அவர் `இப்ப வர பொடியைப் போட்டா தும்மலே வரமாட்டேங்குது. கான்சராம் என்று காசுவலாகச் சொல்வார். அதுபோல் என்னிடமும் புல்லாங்குழல் ஊதினால் ஆஸ்துமா வரும் என அச்சுறுத்தினார்கள். அவர்களிடம் `யோவ்! நான் ஊதினா ஸரிகமாவே சரியா வரமாட்டேங்குது. இதுல ஆஸ்துமா எப்படி வரும்? எனக் கேட்கத் தோன்றும்.

இன்னும் சிலர் பாம்பு வரும் என்றெல்லாம் பயமுறுத்தினார்கள். அதெல்லாம் கிருஷ்ண பரமாத்மா ஊதினால்தான் வரும் எனப் பின்னாளில் தெரிந்து கொண்டேன் . நான் ஊதுவதைக் கேட்டு பயந்து வீட்டில் சாதுவாகச் சுற்றிக்\ கொண்டிருந்த ரெண்டு ஜோடிப் பல்லிகளும் தலைதெறிக்க ஓடி தனிக்குடித்தனம் போய்விட்டன.

புல்லாங்குழல் போன்ற இசைக்கருவிகள் கற்றுக்கொள்வது மிகக் கஷ்டமான செயல் – அண்டை அயலாருக்கும், வீட்டு மனிதருக்கும். ஒருமுறை நான் கஷ்டப்பட்டு சாதகம் பண்ணிக் கொண்டிருந்தபோது என் அப்பா `ரொம்ப நேரமாக் குக்கர் விசிலடிக்கிறது. வெயிட் போட்டியா? என அம்மாவைக் கடிந்து கொண்டார். சாதகம் பண்ணுவது சாதம் பண்ணுவதாக மற்றவர்களுக்குத் தோன்றுகிறது.

அதிலும் அனைவரும் தூங்கப் போன பின்பே நமக்கு இசையார்வம் பொங்கி வழியும். கேட்பவர்கள் நீலாம்பரி ராகம் வாசித்தாலும் அது ஒப்பாரி போல் காதில் விழுந்து நித்திரையிலிருந்து திகைத்து எழுந்து கொள்வார்கள். ஒரு முறை `ஏன் கூர்க்கா ரொம்ப நேரமாக அதிகாலையில் விசிலடித்துக் கொண்டே இருக்கிறார் என அக்கம்பக்கத்தில் ஒரே பரபரப்பு. பூபாள ராகத்தை நான் வாசித்தது நேபாள கூர்க்காவின் விசிலோசைபோல் கேட்டிருக்கிறது\ அவர்களுக்கு.

இதனால் சில நன்மைகளும் விளைவதுண்டு. ஒழுங்காத் தூங்கறயா.. இல்லே, அப்பாவைப் புல்லாங்குழல் வாசிக்கச் சொல்லவா? எனக் குழந்தையைத் தூங்க வைக்க உதவியது இப்பயிற்சிதான்.

ஒருநாள் பக்கத்து வீட்டுக்காரர் வந்து `நீங்க புல்லாங்குழல் கத்துக்கறது ரொம்ப சந்தோஷம் என்றார். ஆமாம் எப்பேர்ப்பட்ட இசை என நான் நினைத்துக் கொண்டிருக்கும்போதே `நீங்க நாதஸ்வரம் கற்றுக் கொள்ள நினைத்திருந்தால் எங்கள் கதி என்னாவது? எனச் சொல்லிவிட்டுக் காதைக் குடைந்து கொண்டு சென்றார்.

ஒருவழியாகத் தட்டுத் தடுமாறி இசை போன்ற ஒன்று வெளிவரத் தொடங்கினாலும் அகால வேளைகளிலும் அதிமுக்கியமான நேரங்களிலும் நீரோ மன்னன் போல் புல்லாங்குழல் வாசித்தால் யாருக்குத்தான் டென்ஷன் வராது? ஒரு முறை நண்பர் ஒருவர் சொன்னார் உங்க மனைவி டென்ஷனானா நீங்க புல்லாங்குழல் வாசித்தே ரிலாக்ஸ் பண்ணிடுவீங்க! என. பாவம் அவருக்குத் தெரியாது அவள் டென்ஷன் ஆவதே நான் புல்லாங்குழல் வாசிப்பதைக் கேட்டுத்தான் என.

எல்லோருக்கும் இம்சை கொடுத்தாலும் அமைதியாக இருக்கும் இரவில் இளையராஜாவின் பாடல் ஒன்றை வாசிக்கும் இன்பம் இருக்கிறதே ..அதற்காக நாலு பேருக்குக் கெடுதல் செஞ்சா தப்பே இல்லை.

                                  9443321004 – ramsych2@gmail.com

அசத்தும் அரசுப்பள்ளி - மணிகண்ட பிரபு

திருப்பூர் வடக்கு பூலுவபட்டி மாநகராட்சி துவக்கப்பள்ளியில் ஐநூறு மாணவ மாணவிகள் பயின்று வருகின்றனர். இந்த ஆண்டு மட்டும் 260 மாணவர்கள் சேர்க்கை நடைபெற்றுள்ளது.

காமராஜர் பிறந்தநாள் கல்வி வளர்ச்சி நாளாக கொண்டாடப்பட்டது. பெற்றோர் ஆசிரியர் கழகத் தலைவர் பட்டுலிங்கம் தலைமை வகித்து, காமராஜர் முகமூடி அணிந்த மாணவ மாணவிகளின் பேரணியைத் துவக்கி வைத்தார். காமராஜரின் பெருமைகளை விளக்கும் விதமாக பதாகைகளை ஏந்தி பள்ளி மாணவர்கள் பூலுவபட்டி பகுதிகளில் ஊர்வலம் வந்தனர்.

இந்த ஆண்டு அரசு துவக்கப்பள்ளியில் புது விதமாக, ஆசிரியர்கள் முயற்சியாலும், பெற்றோர்களின் ஒத்துழைப்பாலும் முதன்முறையாக விளையாட்டுச் சீருடை அறிமுகப்படுத்தப்பட்டுள்ளது.

இதன்படி ஒன்றாம் வகுப்பு-சிவப்பு / இரண்டாம் வகுப்பு-நீலம் / மூன்றாம் வகுப்பு-பச்சை / நான்காம் வகுப்பு-மஞ்சள்/ ஐந்தாம் வகுப்பு- ஆரஞ்சு வண்ணங்களில் சீருடை வழங்கப்பட்டுள்ளது.

பிரதி வெள்ளிதோறும் விளையாட்டுச் சீருடை அணிந்துவர அறிவுறுத்தப்பட்டுள்ளது. புதிய சீருடை பெற்றோர்களிடையே மிகுந்த மகிழ்ச்சியையும் வரவேற்பையும் பெற்றுள்ளது.விரைவில் ஐந்து வகுப்பிற்கும் தொடுதிரையுடன் கூடிய ஸ்மார்ட் வகுப்பு துவங்க உள்ளது.

மணிகண்டபிரபு (9942887500)

150 கிலோ சோப்புக்கட்டியின் கதை

குஜராத்திலிருந்து புறப்பட்டு, உத்தரபிரதேச மாநிலத் தலைநகர் லக்னோவை நோக்கி ரயிலில் சென்று கொண்டிருந்த சுமார் 45 பேரை, ஜான்சி ரயில் நிலையத்திலேயே மடக்கி சிறைப்படுத்தி நிறுத்திவிட்டனர் காவல் துறையினர். அவர்கள் யாரும் தீவிரவாதிகள் அல்ல. எந்த அராஜக சதித்திட்டத்தோடும் அவர்கள் போய்க்கொண்டிருக்கவில்லை. நீதிக்காக அவர்கள் எழுப்பிய குரலே போதுமானதாக இருந்தது அவர்களை ஒடுக்கத் துடிக்கும் ஆளும் வர்க்கத்திற்கு. குஜராத் மண்ணிலிருந்து சென்றிருந்த தலித் போராளிகளான அவர்கள் மிகுந்த கவனமெடுத்து தயாரித்த சோப்புக்கட்டியும் சரி, அதில் அவர்கள் அக்கறையோடு செதுக்கியிருந்த புத்தர் உருவமும் சரி உத்தரபிரதேச மாநில முதல்வர் யோகி ஆதித்யநாத் கையில் கொண்டு சேர்க்கத்தான் கொண்டு செல்லப்பட்டது.

எளிய சந்நியாசி என்று புகழப்படும் யோகி ஆத்தியநாத், முதல்வராகப் பொறுப்பேற்றுக் கொண்டபிறகு, கடந்த மே மாதத்தில் குஷி நகர் அருகே உள்ள தலித் பிரிவு மக்கள் வாழிடத்திற்கு அவர் செல்வதற்கு முன்னதாக அரசு தரப்பிலிருந்து குடும்பங்கள் ஒவ்வொன்றுக்கும் சோப்புக்கட்டி, ஷாம்பூ எல்லாம் வழங்கப்பட்டு, சுத்த பக்கமாக இருக்க வேண்டும் என்று அறிவுறுத்தப்பட்டிருந்தது.

இதற்கு நெத்தியடி கொடுப்பதற்கு குஜராத்திலிருந்து புறப்பட்டு வந்த தலித்துகள், புத்தர் உருவம் பொறித்த மிகவும் கனமான சோப்புக் கட்டியை எடுத்து வந்திருக்கின்றனர். அவர்களது முழக்கம் என்னவாக இருந்தது என்றால், ”இந்தா சோப்பு.. உன் உடலை மட்டுமல்ல, உள்ளத்தையும் தூய்மைப்படுத்திக் கொள் என்பதாகும்.

”துணி வெளுக்க மண்ணுண்டு,

தோல் வெளுக்க சாம்பலுண்டு,

மணி வெளுக்க சாணையுண்டு

என்று எழுதிய மகாகவி பாரதி,

மனம் வெளுக்க வழியில்லையே

எங்கள் முத்துமாரி ...

என்று இழைத்தான். சாதியத் திமிர்த்தனம் கவிந்திருக்கும் உள்ளத்தின் இருட்டை விரட்டியடித்து ஒளியைக் குடியேற்றத்தான் புத்தனின் உருவம் பொறித்த சோப்புக்கட்டியை இவர்கள் கொண்டு சென்றனர். ஊடக உலகம் இதை உரிய அளவில் நாடு நெடுகக் கொண்டு செல்லாமல் உள்ளூர் செய்தியாகப் பேசிக் கதையை முடித்து விட்டது.

எஸ்.வி.வேணுகோபாலன்

(கலை இலக்கிய இதழ் மக்கள்

வீதியில் எழுதிய கட்டுரையிலிருந்து)